وزیراعظم شہباز شریف دی صدارت اچ وفاقی کابینہ دا اجلاس ،  فرینکفرٹ  اچ پاکستانی قونصلیٹ تے حملے اتے پاکستانی پرچم دی بے حرمتی دی شدید مذمت  ،مظلوم فلسطینیاں نال اظہار یکجہتی   اتے اسرائیلی ظلم تے بربریت دی مذمت سانڳے قرارداد منظور

اسلام آباد۔24جولائی(اے پی پی) وفاقی کابینہ فرینکفرٹ اچ پاکستانی قونصلیٹ تے حملے تےپاکستانی پرچم دی بے حرمتی دی شدید مذمت کیتی اے جݙاں جو مظلوم فلسطینیاں نال اظہار یکجہتی کریندے اسرائیلی ظلم و بربریت دی مذمت سانڳے قرارداد دی منظوری ݙے ݙتی،ملک اچ کاروباری سرگرمیاں، سرمایہ کاری اتے سیاحت دے ودھارے سانڳے 126 ملکاں کیتے  آن لائن ویزا ایپلی کیشن سسٹم دے نفاذ دی وی منظوری ݙتی جیں توں انہاں ملکاں دے شہری 24 گھنٹے اندر بزنس اتے ٹورسٹ ویزہ گھن سڳسن ۔ وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی صدارت اچ وفاقی کابینہ دا اجلاس تھیا۔  اجلاس اچ ڳالھ کریندے وزیراعظم آکھیے فلسطین اچ جاری اسرائیل دی اڄوکی بہیمانہ کارروائیاں دی تاریخ اچ مثال نی ملدی ۔ انہاں آکھیے غزہ تے فلسطین دے ٻئے علاقیں اچ نشوم ٻالاں تے تریمتاں سودھے ہر شہری اسرائیلی بربریت دا نشانہ بݨدا پئے۔ انہاں آکھیے  آستانہ اچ شنگھائی تعاون تنظیم اتے شنگھائی تعاون تنظیم پلس دی کانفرنسز اچ میں فلسطین دے مظلوم عوام سانڳے تکڑی آواز چاتی ۔ وزیراعظم فلسطین دے مسئلے دا حل اقوام متحدہ دی قرارداداں دی روشنی اچ کرݨ تے زور ݙتا ۔وزیراعظم اتے کابینہ ارکان فرینکفرٹ ، جرمنی اچ پاکستانی قونصلیٹ تے تھیوݨ آلے حملے تے پاکستانی پرچم دی بے حرمتی دی شدید مذمت کیتی۔ وزیراعظم آکھیے واقعے اچ ملوث لوکاں دے خلاف سخت کاروائی تھیوݨی چاہیدی اے ۔وزیراعظم دہشت گردی دی اڄوکیاں کارروائیاں دی مذمت کریندے انہاں واقعات اچ شہید تھیوݨ آلے سکیورٹی فورسز دے نینگراں کوں عقیدت پیش کیتے تے انہاں دے اُچے درجات سانڳے دعا منگی ۔وفاقی کابینہ ملک اچ کاروباری سرگرمیاں، سر مایہ کاری اتے سیاحت دے ودھارے سانڳے 126 ملکاں سانڳے آن لائن ویزا ایپلی کیشن سسٹم دے نفاذ دی منظوری ݙتی جیں دے تحت انہاں ملکاں دے شہری 24 گھنٹے اچ بزنس اتے ٹورسٹ ویزا گھن سڳس ں ،انھاں 126 ملکاں دے شہری ویزا پراسیسنگ فیس توں وی مستثنیٰ ہوسن ۔ ایں توں انڄ تریجھے ملک دا پاسپورٹ رکھݨ آلے سکھ یاتریاں سانڳے ویزا آن آرائیول دی سہولت سانڳے انڄ سب۔کیٹیگری دی منظوری وی ݙتی ڳئی ۔ایں حالے نال وفاقی وزارت داخلہ اچ ھک ڈیش بورڈ وی بݨایا ویسی جیڑھا آن لائن ویزا دے نظام دی نگرانی کریسی۔وفاقی کابینہ اسلام آباد، بلوچستان، سندھ، لاہور تے پشاور دے معزز ہائی کورٹس اتے وفاقی وزارتِ قانون و انصاف دی سفارش تے بینکاں دے مقدمیں دے حوالے نال خصوصی عدالتاں تے بینکنگ کورٹس نوٹیفائی کرݨ دی منظوری ݙتی  سکیورٹی اینڈ ایکسچینج کمیشن آف پاکستان ایکٹ 1997 دے سیکشن 37 دے تحت اسلام آباد ہائی کورٹس دا تجویز کیتا ڳیا اسپیشل کورٹ(Offences in Banks) اسلام آباد، ہائی کورٹ آف بلوچستان، کوئٹہ دا تجویز کیتا ڳیا اسپیشل کورٹس (Offences in Banks) کوئٹہ، ہائی کورٹ آف سندھ، کراچی دا تجویز کیتا ڳیا اسپیشل کورٹ (Offences in Banks) کراچی، لاہور ہائی کورٹ، لاہور دا تجویز کیتا ڳیا اسپیشل کورٹس (Offences in Banks-I & II) لاہور، اسپیشل کورٹ  (Offences in Banks)، ملتان اتے پشاور ہائی کورٹ، پشاور دا تجویز کیتا ڳیا بینکنگ کورٹ 1، پشاوربݨایا ویسی ۔  اے خصوصی اتے بینکنگ عدالتاں سکیورٹی اینڈ ایکسچینج کمیشن دے تحت کم کریسن ۔وفاقی کابینہ پاکستان اتے ڈنمارک وچال لاجسٹکس ، ٹرانسپورٹ، گرین اینڈ سسٹین ایبل گروتھ، واٹر ویسٹ مینجمنٹ ، اربن گرین ڈویلپمنٹ،  متبادل توانائی اتے بنیادی ڈھانچے دی تعمیر دے شعبیں اچ پبلک پرائیویٹ پارٹنر شپ دے ودھارے دے حوالے نال مفاہمتی یادداشت تے دستخط کرݨ دی مںظوری ݙتی ۔ وفاقی کابینہ دے اجلاس اچ مظلوم فلسطینی بھرا بھیݨاں تے ٻالاں نال اظہار یکجہتی اتے اسرائیلی ظلم وبربریت دی شدید ترین الفاظ اچ مذمت سانڳے قرارداد دی منظوری ݙتی ڳئی ۔قرارداد اچ آکھیا ڳئے 7 اکتوبر 2023 توں ہݨ تئیں اسرائیل دے ظالمانہ اقدامات پاروں 39 ہزار توں ودھ فلسطینی شہید تھی چکن جنہاں اچ نشوم ٻال تریمتاں بزرگ تے ہر عمر تے طبقے توں تعلق رکھݨ نہتے بے گناہ شہری شامل ہن، شہری آبادی، ہسپتال، سکول، اقوام متحدہ ، میڈیا دے دفتر اتےورکر، صحافی کوئی وی اسرائیلی بماں، گولیاں تے قتل عام دی بلا امتیاز مہم توں محفوظ کائنی، فلسطینی علاقے قبرستان اتے ملبے دا ڈھیر بݨ چکن ، ایجھی سفاکی، بربریت اتے ظلم دی مثال اڄوکی تاریخ اچ کتھائیں نی ملدی ، اسرائیل دا ظلم ݙیکھدے چھڑی مذمت کافی کائنی کیوں جو عالمی عدالت انصاف دے فیصلے، اقوام متحدہ دی قرارداداں ، انسانی حقوق دی تنظیماں، اداریں دے مطالبات اتے پوری دنیا دے مہذب اتے انصاف پسند عوام دے احتجاج دے باوجود اسرائیل دا ظلم جاری اے لہٰذا عالمی برادری اتے عالمی ادارے نسل کشی اتے جنگی جرائم اچ ملوث ریاست دے خلاف پابندیاں سودھے قانونی ، سفارتی اتے انتظامی اقدامات دا آغاز کرن ۔ ھک وحشی ریاست کوں عالمی قانون اتے انسانی حقوق دا پابند کرتے مزید بے گناہ خون وہاوݨ توں روکیا ونڄے نتاں اے بھاہ پوری دنیا دے امن کوں اڄاڑ ݙیسی ۔ قرارداد اچ اسرائیل دے خلاف جنگی جرائم دا مقدمہ چلاوݨ دا مطالبہ کیتا ڳئے ۔ عالمی عدالت انصاف فلسطینی علاقیں اچ اسرائیل دی موجودگی کوں غیرقانونی تے فلسطینی علاقیں اچ اسرائیلی آبادیاں دی تعمیر کوں عالمی قانون دی خلاف ورزی قرار ݙے چکی اے۔ عالمی عدالت انصاف فلسطینیاں کوں زرتلافی ݙیوݨ تے انہاں دا ضیان بھرݨ دا حکم ݙتے ۔ اسلامی جمہوریہ پاکستان اسلامی ملکاں دی متحدہ آواز او آئی سی تے وی زور ݙتے ایں ضمن اچ متفقہ اتے متحدہ اقدامات سانڳے نویں سروں کوششاں شروع کیتیاں ونڄن اسلامی دنیا دی متفقہ حکمت عملی دی تیاری تے غور کیتا ونڄے۔ وفاقی کابینہ 4 جولائی کوں آستانہ اچ شنگھائی تعاون تنظیم دے سربراہی اجلاس اچ فلسطین دی صورتحال تے واضح اتے ݙو ٹوک موقف بیان کرݨ دی تعریف کریندے ایندی پوری تائید کریندی اے تے عالمی برادری توں مطالبہ کریندی اے انسانیت دے خلاف جرم دے ارتکاب تے اسرائیل توں جواب ڳھدا ونڄے تے بے گناہ دے قاتلاں کوں وختی انصاف دی کچاری اچ کھڑا کیتا ونڄے ۔ خود عالمی عدالت انصاف وی اسرائیل دی بہیمانہ کارروائیاں کوں فلسطینیاں دی نسل کشی قرار ݙے چکی اے ۔عالمی برادری غزہ اچ وختی جنگ بندی اتے  انسانی امداد دی رسائی سانڳے آپݨیاں کوششاں ودھاوے ۔ اسلامی جمہوریہ پاکستان دی وفاقی کابینہ پاکستان دے عوام اتے ریاست دی نمائندگی کریندے ایں عزم دا اعادہ کریندی اے جو فلسطین اتے مقبوضہ جموں وکشمیر دے عوام دی آزادی ، اقوام متحدہ تے عالمی قانون  موجب حقوق دی فراہمی تئیں ہر طرح توں انہاں دی مدد جاری رکھیسی ۔ فلسطینیاں کوں خوراک سودھے ٻیا ضروری سامان ݙیوݨ سانڳے پہلے توں ودھ تے کوششاں کیتیاں ویسن۔ پاکستان ھک واری ول اقوام متحدہ اتے عالمی برادری تے زور ݙیندے مقبوضہ خطیں دے پراݨے جھیڑے دے حل سانڳے بلاتاخیر اقدامات کیتے ونڄن۔ القدس الشریف دارالحکومت اتے 1967  توں پہلے دی سرحداں دی حامل فلسطینی ریاست دے قیام تے مبنی ݙو ریاستی حل سانڳے نویں سروں نتیجہ خیز کوششاں کیتیاں ونڄن