اسلام آباد۔8اگست (اے پی پی) اسپیکر قومی اسمبلی سردار ایاز صادق میجر طفیل محمد شہید (نشانِ حیدر) کوں خراج عقیدت پیش کریندیں ہوئیں آکھیا جو انہاں 1958 اچ مادرِ وطن دے دفاع کیتے شہادت دا رتبہ حاصل کیتا اتے جرات تے بہادری دی لازوال تاریخ رقم کیتی۔ اے گالھ انہاں میجر طفیل شہید (نشان حیدر) دی 67 ویں برسی دے موقع تے آپݨے سنیھے اچ آکھی۔ اسپیکر آکھیا جومیں میجر طفیل محمد شہید کوں انہاں دی 67 ویں برسی تے خراجِ عقیدت پیش کرینداں۔ قوم آپݨے ایں بہادر ہیرو کوں سلام پیش کریندی اے، شہید قوم دے محسن اتے ہیرو ہن۔ اسپیکر قومی اسمبلی آکھیا جو جیوندی قوم آپݨے شہیداں اتے ہیروز کوں ہمیشہ یاد رکھیندی اے، شہیداں دی قربانیاں پاروں اڄ اساں آزاد ہوا اچ ساہ گھندے پئیوں، پوری قوم کوں آپݨے بہادر سپوتاں تے ناز اے۔
