ویانا۔ 20 ستمبر (اے پی پی) بین الاقوامی ایٹمی توانائی ایجنسی (آئی اے ای اے) دے ڈائریکٹر جنرل رافیل ماریانو گروسی پاکستان دے پرامن جوہری پروگرام دی پیشرفت تے ادارے نال نیڑے تعاون دی تعریف کیتی اے۔ اے اعتراف انہاں ویانا وچ 69ویں آئی اے ای اے جنرل کانفرنس دے موقع تے چیئرمین پاکستان ایٹمی توانائی کمیشن (پی اے ای سی) ڈاکٹر راجہ علی رضا انور نال ملاقات دے بعد ہک سوشل میڈیا پیغام آکھیے۔ رافیل ماریانو گروسی پاکستان دے سول نیوکلیئر انرجی پروگرام دی پیشرفت کوں قابل تعریف قرار ݙیندے خاص طور تے چشمہ نیوکلیئر پاور پلانٹ یونٹ 5 (C-5) دی تعمیر کوں اہم سنگ میل قرار ݙتا۔ انہاں یاد ݙیوایا جو فروری 2025 وچ انہاں C-5 دی سائٹ تے پہلے کنکریٹ پاون دے مرحلے دا مشاہدہ کیتا ہئی۔ ملاقات وچ آئی اے ای اے تے پاکستان وچال مختلف پروگرام تے تعاون دا جائزہ ڳھدا ڳیا جنہاں وچ خوراک دی پیداوار، حفاظت تے کیڑیں دے کنٹرول وچ جوہری ٹیکنالوجی دے استعمال تے کینسر دے علاج کیتے نیوکلیئر میڈیسن تے ریڈیوتھراپی دیاں سہولتاں ݙیوݨ شامل اے۔ رافیل ماریانو گروسی پاکستان دی صلاحیت سازی، تربیت تے سماجی و اقتصادی ترقی وچ جوہری ٹیکنالوجی دے استعمال دے حوالے نال کوششاں دی تعریف کیتی۔ انہاں آکھیے جو پاکستان پرامن جوہری ٹیکنالوجی دے استعمال وچ اہم شراکت دار اے۔ چیئرمین پی اے ای سی یقین ݙیوائے جو پاکستان جوہری ٹیکنالوجی دے پرامن استعمال کیتے پرعزم اے تے اوں دا نیوکلیئر پاور پروگرام قومی ترقیاتی اہداف تے آئی اے ای اے دے فریم ورک دے موجب اے۔ انہاں آکھیے جو پاکستان دے جوہری بجلی گھر اعلیٰ ترین حفاظتی معیار موجب چلائے ویندے پئن تے ملک کوں کم کاربن، قابل اعتماد بجلی ݙیندے پئن۔ ملاقات وچ ایشیا پیسفک دے خطے وچ پاکستان دے کردار تے وی ڳالھ مہاڑ تھئی جئیں تے پاکستانی ماہرین اپݨا علم ݙوجھے دیساں نال شیئر کریندے پئن۔ پاکستان ہک واری ول اے عزم دوہرائے جو او آئی اے ای اے تے رکن دیساں نال رل تے پرامن جوہری تعاون تے پائیدار ترقی کیتے کم کریندا رہسی
.jpg)
