کوالا لمپور۔7اکتوبر (اے پی پی) وزیراعظم محمد شہباز شریف آکھیا جو پاکستان اتے ملائیشیا وچال اقتصادی اتے تجارتی شعبیاں اچ تعاون ودھاوݨ دی بہوں گنجائش اے، حکومت پاکستان سرمایہ کاری اچ سہولت کیتے اصلاحات تے توجہ ݙیندی پئی اے، آئی ٹی، ٹیک اتے اے آئی دے شعبیاں اچ وسیع استعداد کوں ݙیکھدیں ہوئیں متعلقہ بین الاقوامی بزنس گروپس اتے سرمایہ کاراں دا خیر مقدم کریسوں۔ منگل کوں وزیراعظم آفس دے میڈیا ونگ توں جاری بیان موجب اے ڳالھیں انہاں ملائیشیا دے بزنس گروپ گوبی پارٹنرز دے وفد نال ڳالھ مہاڑ کریندیں ہوئیں کیتی جئیں گوبی پارٹنرز دے کو-فاؤنڈر اتے چیئر تھامس ساؤ دی سربراہی اچ انہاں نال ملاقات کیتی۔ ملاقات اچ نائب وزیراعظم تے وزیر خارجہ اسحاق ڈار، وفاقی وزیر تجارت جام کمال خان، وفاقی وزیر برائے قومی غذائی تحفظ و تحقیق رانا تنویر حسین، وفاقی وزیر اطلاعات تے نشریات عطاء اللہ تارڑ، وزیراعظم دے معاون خصوصی طارق فاطمی اتے متعلقہ اُوچے سرکاری افسران وی موجود ہن۔ وزیراعظم آکھیا جو پاکستان اتے ملائیشیا وچال اقتصادی اتے تجارتی شعبیاں اچ تعاون ودھاوݨ دی بہوں استعداد موجود اے جئیں کیتے ݙوہائیں فریق بھرپور کم کریندے پئن، ݙوہائیں ملکاں وچال بزنس ٹو بزنس روابط ودھاوݨ دے حوالے نال گزریل ݙینھ پاکستان ملائیشیا بزنس اینڈ انویسٹمنٹ کانفرنس دا انعقاد انتہائی خوش آئند اے۔ وزیراعظم آکھیا جو اساں کاروبار کیتے دوستانہ ماحول بݨاوݨ اتے کاروبار کرݨ اچ آسانی کوں بہتر بݨاوݨ کیتے پرعزم ہن، خصوصی سرمایہ کاری سہولت کونسل ٻاہرلی سرمایہ کاراں کوں ہر قسم دی سہولتاں دی فراہمی کیتے کوشاں اے۔ وزیراعظم آکھیا جو پاکستان دے سٹارٹ اپ ایکو سسٹم تے گوبی پارٹنرز دا اعتماد خوش آئند اے، حکومت پاکستان سرمایہ کاری سہولت اتے بنیادی ڈھانچے تئیں بہتر رسائی دے ذریعے سٹارٹ اپس اتے ابتدائی مرحلے دے سرمایہ کاراں دی مدد کیتے توجہ نال اصلاحات تے کم کریندی پئی اے۔ وزیراعظم آکھیا جو ہک پائیدار سٹارٹ اپ ماحولیاتی نظام دی تعمیر کیتے بین الاقوامی اتے ملکی سرمایہ کوں راغب کرݨ اساݙی ترجیح اے، ڈیجیٹل معیشت خاص کر فن ٹیک، ای کامرس اتے آئی ٹی خدمات اساݙی قومی ترقی دی حکمت عملی اچ مرکزی حیثیت رکھیندن۔ وزیراعظم آکھیا جو اساں پاکستان دے آئی ٹی، ٹیک، اتے اے آئی دے شعبیاں اچ وسیع استعداد کوں ݙیکھدیں ہوئیں متعلقہ بین الاقوامی بزنس گروپس اتے سرمایہ کاراں دا خیر مقدم کریسوں۔ ملاقات اچ گوبی پارٹنرز دے وفد پاکستان اچ ای-کامرس اتے فنانشل ٹیکنالوجیز دے شعبے اچ اشتراک اچ گہری دلچسپی دا اظہار کیتا۔
