سیالکوٹ۔12ستمبر(اے پی پی) وزیر دفاع خواجہ محمد آصف آکھیے اڄوکی پاک بھارت جنگ اچ اللہ دی مدد نال پاکستان عظیم کامیابی حاصل کیتی، ساݙی پوری قوم “بنیان مرصوص” سیسہ پلائی ہوئی دیوار بݨی ہوئی ہئی۔ ساݙے بہادر جواناں دا جذبہ حب الوطنی ݙیکھݨ آلا ہئی جیڑھے آپݨے وطن عزیز اُتے آپݨیاں جاناں قربان کرݨ کوں ماݨ سمجھدے پئن اتے آپݨی دھرتی ماء دے ہک ہک انچ دی حفاظت کیتے سیسہ پلائی دیوار بݨے ہوئے ہن، میں ایں لمحے دا وی ݙیکھݨ آلا ہاں جݙاں فیلڈ مارشل سید عاصم منیر ایں تاریخی لڑائی کوں “بنیان مرصوص” دا ناں ݙتا۔ جنگ دے بعد وزیراعظم محمد شہباز شریف دے نال انہاں بہادر نوجواناں نال ملاقات کیتی جنہاں بھارتی ایئر فورس دا مقابلہ کیتا، انہاں اچ ہک دھی وی شامل ہئی، او منظر ایجھا روح پرور ہئی جو تساں سوچ وی نی سڳدے اتے میں بیان نی کر سڳدا۔ اے ڳالھ انہاں گورنمنٹ کالج ویمن یونیورسٹی (جی سی ڈبلیو یو) سیالکوٹ اچ یوم دفاع دے حوالے نال تھیوݨ آلی تقریب توں خطاب اچ آکھی۔ انہاں آکھیا جو وزیر اعظم دے نال ایئر بیس اُتے نوجواناں دا جذبہ ݙیکھ تے دل فخر نال اچا تھی ڳیا۔ انہاں آکھیا جو شہید میجر رمضان آپݨے ساتھی کوں بچیندے جان قربان کیتی اتے شہید دی والدہ پتر دی شہادت اُتے فخر دا اظہار کیتا۔ انہاں آکھیا جو ساݙے شہید قوم دے اصل محسن ہن۔ انہاں آکھیا جو اساں جنگ لڑی اتے اللہ تعالیٰ وݙی مہربانی کیتی اتے سانڳے فتح نصیب تھئی۔ انہاں آکھیا جو میں دنیا اچ جتھاں وی وینداں لوک میکوں اے پچھدن جو اے کیویں ممکن تھیا تاں میں انہاں کوں اے ݙسینداں جو ایں جنگ دے دوران ساݙی بہادر افواج دا ایمانی جذبہ ݙیکھݨ آلا ہئی اتے آپݨے وطن عزیز دی محبت نال بھریا ہویا ہا اتے میݙے کیتے اے اعزاز دی ڳالھ ہے جو میں ایں ڳالھ دا ݙیکھݨ آلا گواہ ہاں۔ وزیر دفاع خواجہ محمد آصف دا آکھݨا ہا جو آپریشن بنیان مرصوص دے دوران ساݙے مُٹھی بھر جہازاں دشمن دے سینکڑاں جہازاں دا بہادری نال مقابلہ کیتا “ٹھیک ٹھیک” نشانے لاتے تاریخ رقم کر ݙتی اتے دشمن دے ناپاک ارادے مٹی اچ ملا ݙتے۔ انہاں آکھیا جو ایہا وجہ اے جو بھارتی قیادت اڄ تئیں زخم چٹیندی پئی اے۔ انہاں آکھیا جو پاکستان دیاں افواج 400 کلومیٹر اندر تئیں بھارت دی فضائیہ کوں ناکام بݨایا اتے دشمن دے ارباں ڈالر دے برا موس سسٹمز بیکار تھی ڳئے۔ انہاں آکھیا جو پوری دنیا پاکستان دے بیانیے کوں منی پئی اے۔ انہاں آکھیا جو اڄ دا پاکستان 1965 دی روح نال بھریا ہویا اے، پاکستانی قوم کوں مٹی نال غیر مشروط محبت اے۔ انہاں آکھیا جو ساݙے نوجواناں دنیا کوں ݙسایا جو پاکستان ناقابل شکست اے، اللہ تعالیٰ قوم کوں ایجھا ویلھا ݙتے جیڑھے ہمیشہ یاد رہسن، پاکستانی عوام جتھاں وی ونڄن دنیا اچ فخر نال سر اُچا ہوندے۔ خواجہ محمد آصف دا آکھݨا ہئی جو جی سی ویمن یونیورسٹی دی طالبات قرات، نعت اتے کلام اقبال سݨا تے سماء بݨا ݙتے۔
.jpg)
