نیویارکـ 23 ستمبر (اے پی پی) نائب وزیراعظم تے وزیر خارجہ سینیٹر محمد اسحاق ڈار نیویارک اچ اقوام متحدہ دے ہیڈ کوارٹر اچ حضرت محمد صلی اللہ علیہ وسلم دے 1500ویں یوم ولادت دی مناسبت نال امن تے رواداری دے کلچر دے فروغ دے حوالے نال او آئی سی دی اعلیٰ سطح دی خصوصی تقریب اچ شرکت کیتی۔ دفتر خارجہ دے مطابق نائب وزیراعظم خطاب اچ آکھیا جو اے امن، انصاف، ہمدردی تے رواداری دی لازوال اقدار تے غور کرݨ دا موقع اے جیڑھی حضور صلی اللہ علیہ وسلم آپݨی تعلیمات تے کردار دی صورت اچ پیش کیتی۔ انہاں دے فلسفے دے اثرات تے روشنی پیندیں ہوئے انہاں آکھیا جو کین٘ویں انصاف، مشاورت، رواداری تے تنازعات دے پرامن حل دے حوالے نال حضور صلی اللہ علیہ وسلم دی تعلیمات دی بازگشت اقوام متحدہ دے چارٹر اچ درج اصولاں اچ سݨائی ݙیندی اے۔ انہاں میثاق مدینہ، معاہدہ حدیبیہ تے مکہ مکرمہ دی پرامن فتح دا حوالہ ݙیندے ہوئیں رسول اکرم صلی اللہ علیہ وسلم دی تعلیمات دی عالمگیر مطابقت کوں اجاگر کیتا۔ انہاں امت مسلمہ دے سامھے موجود چیلنجز دی طرف توجہ ڈیندیں ہوئے آکھیا جو فلسطین تے کشمیر دے تنازعات تے ودھدے ہوئے اسلامو فوبیا جیہیں ناانصافیاں نال عالمی امن کوں نقصان تھیندے۔ انہاں او آئی سی تے زور ݙتا جو او مسلماناں دے ناقابل تنسیخ حقوق دے تحفظ تے امت اچ فرقہ ورانہ تقسیم دے خاتمے کیتے کوششاں تیز کرے۔ انہاں امن تے رواداری دے کلچر دے فروغ کیتے او آئی سی تے اقوام متحدہ دے درمیان مضبوط شراکت داری تے زور ݙتا۔
.jpg)
