اسلام آباد۔24جنوری(اے پی پی) وفاقی وزیر توانائی (پاور ڈویژن )سردار اویس احمد خان لغاری ورلڈ بینک کوں ڈسٹری بیوشن لیول ٹرانسفارمرز تے اسمارٹ میٹرزلاوݨ سانڳے فنڈز تے سرمایہ کاری دی دعوت ݙتی اے ایں دا مقصد شفافیت یقینی بݨاوݨ تےغیر منصفانہ لوڈ مینجمنٹ کوں ختم کرݨا اے ۔ ورلڈ بینک دے نائب صدر جنوبی ایشاء مارٹن ریزر ھک وفد دے رلے انہاں نال ملاقات کیتی۔ وفاقی وزیر پٹرولیم ڈاکٹر مصدق ملک وی ایں ملاقات اچ موجود ہن ۔ وفاقی وزیراویس لغاری ݙسایا ایں ویلھے اسمارٹ میٹرز گھریلو تے گرڈ سطح تے لاتے ویندے پئن جیں دے مثبت نتیجے سامݨے آئن ، ٹرانسفارمرز دی سطح تے اسمارٹ میٹرز نہ لاتے ڳئے تاں کہیں علاقے اچ مطلوبہ کارکردگی تے منصفانہ لوڈ مینجمنٹ ممکن نہ تھی سڳسی ۔ انہاں مزید آکھیے اے اسمارٹ میٹرز پیک لوڈ مینجمنٹ اچ وی مددگار ثابت تھی سڳدن ۔ انہاں ورلڈ بینک کوں لیسکو تے میپکو اچ اسمارٹ میٹرنگ کیتے پبلک پرائیویٹ پارٹنرشپ موڈ اچ سرمایہ کاری دی دعوت ݙتی ۔ انہاں ݙسائے اے ڈسٹری بیوشن کمپنیاں وختی نجکاری دی لسٹ اچ آندیاں پئن ۔وفاقی وزیر ݙسایا “بجلی سہولت پیکج” پاروں دسمبر 2024 اچ پچھلے سال دی نسبت صنعتی شعبے اچ بجلی دے استعمال اچ 7 فیصد ودھارا تھئے ۔ وفاقی وزیرݙسائے پاور سیکٹر وختی “متعد خریدار تے ٻہوں وکامت کنندہ مارکیٹ” اچ داخل تھیسی تے سی پی پی اے ہݨ مزید کوئی معاہدے کرݨ دی مجاز نہ ہوسی ،مسابقت اتے قابل استطاعت قیمتاں پاور سیکٹر دی ترقی اچ مددگار ہوسن ۔ ورلڈ بینک دے ریجنل نائب صدر پاور ڈویژن دی اصلاحات دی تعریف کیتی تے فنڈز دے وختی استعمال دی اہمیت تے زور ݙتا انہاں ٹرانسفارمر لیول تے اسمارٹ میٹرز لاوݨ کوں سپورٹ کریندے آکھیے ورلڈ بینک ٹیم ایں منصوبے دی تفصیل متعلقہ اسٹیک ہولڈرزنال طے کریسی ۔ ملاقات اچ ورلڈ بینک تے پاور ڈویژن وچال مزید تعاون اتے تکنیکی سطح تے ڳالھ مہاڑ ودھاوݨ تے اتفاق تھئے تاں جو پاور سیکٹر اچ مؤثر پالیسی سازی ممکن تھی سڳے۔
