اسلام آباد۔20اگست (اے پی پی) وفاقی وزیر صحت مصطفیٰ کمال آکھیے جو وزارت صحت دے فیصلے براہ راست انسانی زندگیاں تے اثر پیندن ایں سانڳے سارے جاری منصوبیں کوں ترجیحی بنیاداں تے اتے مقررہ ویلھے اچ مکمل کیتا ونڄے۔ انہاں ایں ڳالھ تے زور ݙتا جو پاکستان جو دنیا دا پنجواں ساریں توں ودھ آبادی آلا ملک اے، کوں آپݨی آبادی اچ ودھارے دی شرح کوں گھٹ کرݨ کیتے موثر حکمت عملی اپݨاوݨی ہوسی۔ اے ڳالھ انہاں وزارت قومی صحت دے اُتلی سطح دے اجلاس دی صدارت کریندیں آکھی جیں اچ وفاقی سیکریٹری صحت، ایڈیشنل سیکریٹری صحت، ڈائریکٹر جنرل ہیلتھ اتے ݙوجھے سینئر حکام شرکت کیتی۔ اجلاس اچ جاری منصوبیں تے پیشرفت دا جائزہ ڳھدا ڳیا۔ انہاں آکھیا جو اساں کوں ایجھی پالیسیاں بݨاوݨ دی لوڑھ اے جو ودھدی ہوئی آبادی تے قابو پاوݨ اچ مدد ݙے سڳن جیں نال صحت دے نظام تے ٻہوں زیادہ دٻاؤ پیندا پئے تے انہاں تے عملدرآمد اچ پیش آوݨ آلے چیلنجز تے ڳالھ مہاڑ کیتی ڳئی۔ انہاں آکھیا جو حکومت دا پہلا مقصد لوکاں دا صرف علاج کرݨ دی بجائے انہاں کوں بیمار تھیوݨ توں روکݨا اے۔ہسپتالاں اچ اساں جیڑھے رش ݙٹھن او کݙاہیں کݙاہیں ایویں لڳدے جویں کوئی سیاسی ریلی ختم تھئی ہووے۔ اساں کوں صحت دی ݙیکھ بھال تے توجہ ݙے تے ایں ٻوجھ کوں گھٹ کرݨ دی لوڑھ اے۔ انہاں نشاندہی کیتی جو پاکستان اچ تقریباً 68 فیصد بیماریاں گندے پاݨی پاروں تھیندن۔ انہاں ایں ڳالھ تے زور ݙتا جو روکݨا علاج توں زیادہ موثر اے۔ انہاں آکھیا جو وزارت صحت ہݨ احتیاطی تدبیراں تے توجہ ݙیندی پئی اے تاں جو شہریاں کوں بیمار تھیوݨ توں پہلے تحفظ کوں یقینی بݨایا ونڄ سڳے۔ انہاں ٻالاں کوں 12 علاج کیتے جوڳیاں بیماریاں توں بچاوݨ کیتے معمول دے حفاظتی ٹیکیں دی اہمیت تے زور ݙتا، پاکستان اتے افغانستان دے علاوہ پوری دنیا توں پولیو دا خاتمہ کر ݙتا ڳئے۔ انہاں زور ݙے تے آکھیا جو اساں کوں آپݨے ٻالاں کوں ایں بیماری توں بچاوݨ کیتے آپݨے حفاظتی ٹیکیں دے نظام کوں مضبوط بݨاوݨا ہوسی۔ موجودہ حکومت ملک اچ بنیادی صحت یونٹس (بی ایچ یوز) کوں مضبوط بݨاوݨ اتے ویلھے سر ݙیکھ بھال کیتے ہک موثر ریفرل سسٹم کوں یقینی بݨاوݨ کیتے کم کریندی پئی اے۔ انہاں مزید آکھیا جو ٹیلی میڈیسن منصوبے دے ذریعے ڈاکٹراں اتے دوائیں کوں عوام دی دہلیز تے گھن آیا ویندا پئے جݙاں جو شہریاں کوں براہ راست آپݨیاں شکایتاں درج کراوݨ دی سہولت کیتے ہیلتھ کمپلینٹ مینجمنٹ سسٹم تے وی عمل درآمد کیتا ویندا پئے۔ انہاں عہدیداراں کوں ہدایت کیتی جو او صحت دے موجودہ نظام اتے ہسپتالاں دی کارکردگی کوں بہتر بݨاوݨ کیتے موثر اقدامات کرن۔ انہاں آکھیا جو اے ساݙی ذمہ واری اے جو اساں دستیاب وسیلیں دے اندر زیادہ توں زیادہ طبی سہولتاں ݙیوں۔
